மாமல்லபுரம் அருகே பையனூர் பழைய மாமல்லபுரம் சாலையில் அம்பேத்கர் சிலை உள்ளது. நேற்று காலை 7 மணிக்கு பையனூரில் இருந்து மாமல்லபுரம் நோக்கி சென்ற மணல் லாரி, சிலை இருந்த பீடம் மீது மோதியது. பீடம் இடிந்து, சிலையும் நொறுங்கியது.
இதனை அறிந்த விடுதலை சிறுத்தை மாவட்ட செயலாளர் சூ.க.விடுதலை செழியன் தலைமையில் மாவட்ட துணை செயலாளர் கிட்டு, மாமல்லபுரம் ஒன்றிய துணை செயலாளர் சிவா, பையனூர் ஊராட்சி துணை தலைவர் செல்வகுமார், உட்பட 300க்கும் விடுதலைச் சிறுத்தைகள் பழைய மாமல்லபுரம் சாலையில் மறியல் செய்தனர்.
இதையடுத்து வருவாய்த்துறை சார்பில் புதிய சிலை கொண்டுவரப்பட்டது. சிலை இருந்த பகுதி போக்குவரத்துக்கு இடையூறு ஏற்படுத்தும் என்பதால், எதிர்திசையில் புதிய பீடம் அமைக்கப்பட்டு சிலை நிறுவப்பட்டது. புதிதாக வைக்கப்பட்ட அம்பேத்கர் சிலைக்கு விடுதலை சிறுத்தைகள் மாலை அணிவித்து பட்டாசு வெடித்தும் கொண்டாடினர்.